ಶನಿವಾರ ರಾತ್ರಿ ಕಳೆದು ತಡರಾತ್ರಿ ಆಗಿತ್ತು! ದೀಪಾವಳಿಯ ಸಂಭ್ರಮ! ಮಡಿಕೇರಿಯ ಸಪ್ತಗಿರಿ ಎಂಟರ್‌ಪ್ರೈಸಸ್ ಕಚೇರಿಯಲ್ಲಿ ಯೋಗೇಶ್ ಅವರು ಇನ್ನೂ ಕೆಲಸ ಮಾಡುತ್ತಿದ್ದರು. ಜಿಲ್ಲೆಗೆ ಔಷಧ ಪೂರೈಸುವ ಸಂಸ್ಥೆ ಅದು. ದೀಪಾಲಂಕಾರ, ಪೂಜೆಯ ಸಿದ್ಧತೆ, ಎಲ್ಲವನ್ನೂ ಉತ್ಸಾಹದಿಂದ ಮುಗಿಸಿ ಮನೆಗೆ ತೆರಳಿದರು.
ಬೆಳಗಿನ ಜಾವ ಸುಮಾರು ಮೂರು ಗಂಟೆ. ಮನೆಯಲ್ಲಿ ಆಕಸ್ಮಿಕವಾಗಿ ಕುಸಿದು ಬಿದ್ದರು.
ಅವರನ್ನು ಮೊದಲು ಮಡಿಕೇರಿ ಜಿಲ್ಲಾ ಆಸ್ಪತ್ರೆಗೆ ಸೇರಿಸಲಾಯಿತು. ಪ್ರಾಥಮಿಕ ಚಿಕಿತ್ಸೆ ಕೊಟ್ಟ ಮೇಲೆ ಹೆಚ್ಚಿನ ಚಿಕಿತ್ಸೆಗಾಗಿ ಮಂಗಳೂರಿಗೆ ಕರೆದೊಯ್ಯಲಾಯಿತು. ಅಲ್ಲಿ ಮಾಡಿದ ವೈದ್ಯಕೀಯ ಪರೀಕ್ಷೆಯಲ್ಲಿ ಕಂಡದ್ದು ಕಠಿಣ ಸತ್ಯ. ಯೋಗೇಶ್ ಅವರ ಮಿದುಳು ನಿಷ್ಕ್ರಿಯವಾಗಿತ್ತು.
ವೈದ್ಯರ ಸಲಹೆಯಂತೆ ಅವರನ್ನು ಮತ್ತೆ ಮಡಿಕೇರಿ ಜಿಲ್ಲಾ ಆಸ್ಪತ್ರೆಗೆ ಕರೆತಂದು ತೀವ್ರ ನಿಗಾ ಘಟಕದಲ್ಲಿ ಚಿಕಿತ್ಸೆ ಮುಂದುವರಿಸಲಾಯಿತು. ಚೇತರಿಸಿಕೊಳ್ಳುವ ಸಾಧ್ಯತೆ ಇಲ್ಲ ಎಂಬ ಮಾತನ್ನು ವೈದ್ಯರು ಕುಟುಂಬಕ್ಕೆ ಹೇಳಬೇಕಾಯಿತು. ಅದೇ ಸಮಯದಲ್ಲಿ ಅಂಗಾಂಗ ದಾನದ ಮಹತ್ವವನ್ನೂ ವಿವರಿಸಿದರು.
ಮಗನನ್ನು ಕಳೆದುಕೊಳ್ಳುತ್ತಿರುವ ನೋವಿನ ನಡುವೆ ತಾಯಿ ನಿರ್ಮಲ ಅವರು ಮತ್ತು ಹಿರಿಯ ಸಹೋದರ ಪ್ರತಾಪ್ ಅವರು ಒಂದು ನಿರ್ಧಾರಕ್ಕೆ ಬಂದರು. ನಮ್ಮ ಮಗನ ಅಂಗಾಂಗಗಳಿಂದ ಇತರರ ಬದುಕಿಗೆ ಬೆಳಕಾಗಲಿ ಎಂದು. ಅದಕ್ಕೆ ಒಪ್ಪಿಗೆ ಸೂಚಿಸಿದರು.
ಅಗತ್ಯ ದಾಖಲಾತಿ ಮತ್ತು ವೈದ್ಯಕೀಯ ಪ್ರಕ್ರಿಯೆಗಳು ಮುಗಿದ ಮೇಲೆ 25ಕ್ಕೂ ಹೆಚ್ಚು ವೈದ್ಯರು ಮತ್ತು ಸಿಬ್ಬಂದಿ ಸುಮಾರು ಎರಡು ಗಂಟೆ ಕಾಲ ಶಸ್ತ್ರಚಿಕಿತ್ಸೆ ನಡೆಸಿದರು. ಯಕೃತ್ ಮತ್ತು ಕಣ್ಣಿನ ಕಾರ್ನಿಯಾಗಳನ್ನು ಹೊರತೆಗೆದು, ತುರ್ತು ವಾಹನದ ಮೂಲಕ ಮೈಸೂರಿನ ಮಣಿಪಾಲ್ ಆಸ್ಪತ್ರೆಗೆ ಕಳಿಸಲಾಯಿತು. ಅಗತ್ಯವಿರುವ ರೋಗಿಗಳಿಗೆ ಅವನ್ನು ಕಸಿ ಮಾಡಲಾಗುತ್ತದೆ.
ಕೊಡಗು ವೈದ್ಯಕೀಯ ವಿಜ್ಞಾನ ಸಂಸ್ಥೆ ಮತ್ತು ಬೋಧಕ ಆಸ್ಪತ್ರೆಯಲ್ಲಿ ನಡೆದ ಎರಡನೇ ಅಂಗಾಂಗ ದಾನ ಇದು!
ಆ ನಂತರದ ಕ್ಷಣ ಮರೆಯುವಂಥದ್ದಲ್ಲ. ಮಣಿಪಾಲ್ ಆಸ್ಪತ್ರೆ ಮತ್ತು ಜಿಲ್ಲಾ ಆಸ್ಪತ್ರೆಯ ವೈದ್ಯರು, ಸಿಬ್ಬಂದಿ, ಕುಟುಂಬದವರು ಯೋಗೇಶ್ ಅವರ ಮೃತದೇಹಕ್ಕೆ ಪುಷ್ಪನಮನ ಸಲ್ಲಿಸಿದರು. ಆಸ್ಪತ್ರೆಯ ಕಾರಿಡಾರ್‌ನಲ್ಲಿ ನೂರಾರು ಮಂದಿ ಸಾಲಾಗಿ ನಿಂತು ಹೂವಿನ ಗೌರವ ಅರ್ಪಿಸಿ ಭಾವಪೂರ್ಣ ವಿದಾಯ ಹೇಳಿದರು.
ಇನ್ನೊಂದು ಮಾತು ಹೇಳಲೇಬೇಕು. ಅಂಗಾಂಗ ದಾನ ಮಾಡುವ ಕುಟುಂಬಗಳಿಗೆ ಜಿಲ್ಲಾ ಆಸ್ಪತ್ರೆಯಲ್ಲಿ ಜೀವಿತಾವಧಿಯವರೆಗೆ ಉಚಿತ ಚಿಕಿತ್ಸೆಯ ಸೌಲಭ್ಯ ಕಲ್ಪಿಸಲಾಗುತ್ತಿದೆ. ಅಂಗಾಂಗ ದಾನದ ಬಗ್ಗೆ ಜನರಲ್ಲಿ ಜಾಗೃತಿ ಹೆಚ್ಚುತ್ತಿದ್ದರೂ ಇನ್ನೂ ಹೆಚ್ಚಿನ ಜಾಗೃತಿ ಬೇಕು ಎಂದು ಸಂಸ್ಥೆಯ ಡೀನ್ ಡಾ. ಲೋಕೇಶ್ ಎ.ಜಿ. ಅವರು ಹೇಳಿದ್ದಾರೆ. ಯೋಗೇಶ್ ಅವರ ಕುಟುಂಬದ ಮಾನವೀಯ ನಿರ್ಧಾರಕ್ಕೆ ಸಾರ್ವಜನಿಕರಿಂದ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗಿದೆ.
ನಮ್ಮಲ್ಲಿ ಎಷ್ಟೋ ಜನ ಅಂಗಾಂಗ ದಾನದ ಹೆಸರು ಕೇಳಿದರೆ ಹಿಂದೆ ಸರಿಯುತ್ತಾರೆ. ಅದು ನಮ್ಮ ವಿಷಯವಲ್ಲ ಎಂದು ತಿಳಿಯುತ್ತಾರೆ. ಆದರೆ ಒಬ್ಬ ತಾಯಿ, ಮಗನ ಕೊನೆಯ ಉಸಿರಿನ ನಡುವೆಯೇ, ಇನ್ನೊಬ್ಬರ ಬದುಕಿಗೆ ಬೆಳಕು ಕೊಡುವ ಧೈರ್ಯ ತೋರಿದರು. ಯೋಗೇಶ್ ಅವರು ಇಲ್ಲ. ಆದರೆ ಅವರ ಒಂದು ಭಾಗ ಎಲ್ಲೋ ಬದುಕಿದೆ!ಎಲ್ಲೋ ನೋಡುತ್ತಿದೆ!
ವರದಿ : ಓಯಾಸಿಸ್ ಸುದ್ದಿ ಮನೆ
ಓಯಾಸಿಸ್ ಸುದ್ದಿ ಮತ್ತು ಜಾಹೀರಾತುಗಳಿಗಾಗಿ ಸಂಪರ್ಕಿಸಿ: nammaoasis@gmail.com, +91 8147424128