ಒಂದು ಕೈಯಲ್ಲಿ ಉಡುಗೊರೆ!ಇನ್ನೊಂದು ಕೈಯಲ್ಲಿ ಬೇಡಿಕೆಯ ಪಟ್ಟಿ!
ನವೆಂಬರ್ 13, ಶುಕ್ರವಾರ. ಪ್ರಧಾನಿ ನರೇಂದ್ರ ಮೋದಿ ಅವರು ಕರ್ನಾಟಕಕ್ಕೆ ಬಂದರು. ಉದ್ಘಾಟನೆ, ಲೋಕಾರ್ಪಣೆ, ಶಂಕುಸ್ಥಾಪನೆ ಎಲ್ಲ ಸೇರಿ ₹15,600 ಕೋಟಿಗೂ ಹೆಚ್ಚು ಮೌಲ್ಯದ ಯೋಜನೆಗಳು! ಅದೇ ದಿನ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ಪ್ರಧಾನಿಗಳ ಮುಂದೆ ಮೂರು ಬೇಡಿಕೆ ಇಟ್ಟರು. ಅದರಲ್ಲಿ ಮೊದಲನೆಯದು, ಕೆಲವೇ ದಿನಗಳ ಹಿಂದೆ ಕರ್ನಾಟಕ ಮತ್ತು ತಮಿಳುನಾಡನ್ನು ಮುಖಾಮುಖಿ ನಿಲ್ಲಿಸಿದ್ದ ಅದೇ ಮೇಕೆದಾಟು!
ಮೊದಲು ಉಡುಗೊರೆಯ ಪಟ್ಟಿ ನೋಡೋಣ.
ಬೆಂಗಳೂರಿನ ನಮ್ಮ ಮೆಟ್ರೊಗೆ ಹೊಸ ಪಿಂಕ್ ಲೈನ್ ಬಂತು! ಕಾಳೇನ ಅಗ್ರಹಾರದಿಂದ ತಾವರೆಕೆರೆವರೆಗಿನ ಈ ಮಾರ್ಗಕ್ಕೆ ಸುಮಾರು ₹3,470 ಕೋಟಿ ಖರ್ಚಾಗಿದೆ! ಐಐಎಂ ಬೆಂಗಳೂರು, ಹಲವು ಶಿಕ್ಷಣ ಸಂಸ್ಥೆಗಳು, ಟೆಕ್ ಮತ್ತು ವಾಣಿಜ್ಯ ಕೇಂದ್ರಗಳಿಗೆ ಹೋಗುವವರಿಗೆ ಇದು ದಾರಿ. 2014ರಲ್ಲಿ ಕೇವಲ 17 ಕಿಲೋಮೀಟರ್ ಇದ್ದ ನಮ್ಮ ಮೆಟ್ರೊ ಈಗ 100 ಕಿಲೋಮೀಟರ್ ದಾಟಿದೆ! ದೆಹಲಿ ಮತ್ತು ಮುಂಬೈ ಮಹಾನಗರ ಪ್ರದೇಶಗಳ ನಂತರ ಈ ಗಡಿ ದಾಟಿದ ಮೂರನೇ ನಗರ ಬೆಂಗಳೂರು. ಲಕ್ಷಾಂತರ ಬೆಂಗಳೂರಿಗರಿಗೆ ಪ್ರಯಾಣ ಸುಲಭವಾಗುವುದಷ್ಟೇ ಅಲ್ಲ, ಹಣ ಮತ್ತು ಸಮಯ ಎರಡೂ ಉಳಿಯುತ್ತದೆ ಎಂದು ಪ್ರಧಾನಿಗಳು ಹೇಳಿದರು. ನವೆಂಬರ್ 12ರಂದು ಪುಣ್ಯತಿಥಿ ಇದ್ದ ದಿವಂಗತ ಅನಂತಕುಮಾರ್ ಅವರನ್ನು ಅವರು ಸ್ಮರಿಸಿದರು.
ರೈಲ್ವೆಯಲ್ಲೂ ಪಾಲು ಸಿಕ್ಕಿದೆ. ನಾಲ್ಕು ಅಮೃತ ಭಾರತ ನಿಲ್ದಾಣಗಳು ಮತ್ತು ಎರಡು ಜೋಡಿ ಹಳಿ ಹಾಗೂ ವಿದ್ಯುದೀಕರಣ ಯೋಜನೆಗಳು. ಚಾಮರಾಜನಗರ, ಚಿಕ್ಕಮಗಳೂರು, ಸಕಲೇಶಪುರ ಮತ್ತು ಸುಬ್ರಹ್ಮಣ್ಯ ರೋಡ್ ನಿಲ್ದಾಣಗಳ ಹೆಸರನ್ನು ಪ್ರಧಾನಿಗಳು ಪ್ರಸ್ತಾಪಿಸಿದರು. ಹಿರಿಯ ನಾಗರಿಕರಿಗೆ ಮತ್ತು ದಿವ್ಯಾಂಗರಿಗೆ ಅನುಕೂಲವಾಗುವ ಸೌಲಭ್ಯಗಳು ಈ ನಿಲ್ದಾಣಗಳಲ್ಲಿವೆ. ಕರ್ನಾಟಕ ಮತ್ತು ಗೋವಾವನ್ನು ಜೋಡಿಸುವ ಹೊಸ ವಂದೇ ಭಾರತ್ ರೈಲು ಕೂಡ ಹಸಿರು ನಿಶಾನೆ ಕಂಡಿತು! ರಾಜ್ಯಕ್ಕೆ ಮೊದಲ ವಂದೇ ಭಾರತ್ ಸ್ಲೀಪರ್ ರೈಲು ಬಂದು ಕೆಲವೇ ದಿನಗಳಲ್ಲಿ ಇದು ಬಂದಿದೆ.
ಇಂಧನ ವಲಯದ ಲೆಕ್ಕ ಹೀಗಿದೆ. ಮಂಗಳೂರಿನ ಎಲ್‌ಪಿಜಿ ಯೋಜನೆ 80,000 ಮೆಟ್ರಿಕ್ ಟನ್ ಸಂಗ್ರಹ ಸಾಮರ್ಥ್ಯ ಸೇರಿಸುತ್ತದೆ. ದೇವನಗೊಂದಿ ಮಾರುಕಟ್ಟೆ ಟರ್ಮಿನಲ್ ಪೆಟ್ರೋಲ್, ಡೀಸೆಲ್ ಮತ್ತು ವಿಮಾನ ಇಂಧನ ಪೂರೈಕೆ ಸುಗಮಗೊಳಿಸುತ್ತದೆ. ಬೆಂಗಳೂರಿನ ಸಂಕುಚಿತ ಜೈವಿಕ ಅನಿಲ ಘಟಕ ದಿನಕ್ಕೆ 13 ಟನ್ ಜೈವಿಕ ಅನಿಲ ತಯಾರಿಸಲಿದೆ. ಇದರಿಂದ ತ್ಯಾಜ್ಯ ನಿರ್ವಹಣೆ ಸುಧಾರಿಸುತ್ತದೆ, ನೈಸರ್ಗಿಕ ಅನಿಲ ಆಮದಿಗೆ ಖರ್ಚಾಗುವ ಹಣವೂ ಉಳಿಯುತ್ತದೆ ಎಂದು ಪ್ರಧಾನಿಗಳು ಹೇಳಿದರು. ಪಿಎಂ ಸೂರ್ಯ ಘರ್ ಯೋಜನೆಯಲ್ಲಿ ಕರ್ನಾಟಕದ 40,000ಕ್ಕೂ ಹೆಚ್ಚು ಕುಟುಂಬಗಳಿಗೆ ಛಾವಣಿ ಸೌರಶಕ್ತಿ ಸಿಕ್ಕಿದೆ, ರೈತರಿಗೆ 8 ಲಕ್ಷಕ್ಕೂ ಹೆಚ್ಚು ಸೌರ ಪಂಪ್‌ಗಳನ್ನು ಒದಗಿಸಲಾಗುತ್ತಿದೆ ಎಂದು ಅವರು ತಿಳಿಸಿದರು. ಅಂದರೆ ಕರ್ನಾಟಕದ ಅನ್ನದಾತರು ಈಗ ಊರ್ಜಾದಾತರೂ ಆಗುತ್ತಿದ್ದಾರೆ ಎಂದರು!
ಈಗ ಬೇಡಿಕೆಯ ಪಟ್ಟಿ!
ಮೊದಲನೆಯದು ಮೇಕೆದಾಟು! ಕಾವೇರಿಗೆ ಅಡ್ಡಲಾಗಿ ಕಟ್ಟುವ ಸಮತೋಲನ ಜಲಾಶಯಕ್ಕೆ ಬೇಕಾದ ಅನುಮತಿಗಳನ್ನು ಕೊಡಿಸಲು ಕೇಂದ್ರ ಸರ್ಕಾರ ಕಾನೂನು ನೆರವು ನೀಡಬೇಕು ಎಂದು ಮುಖ್ಯಮಂತ್ರಿಗಳು ಕೇಳಿದರು. ಸುಪ್ರೀಂ ಕೋರ್ಟ್ ಮೇಕೆದಾಟು ಕಟ್ಟಬೇಕು ಎಂದು ಹೇಳಿದೆ, ಅರಣ್ಯ ಅನುಮತಿ ಈಗಾಗಲೇ ಸಿಕ್ಕಿದೆ, ಕೇಂದ್ರ ಅಂತಿಮ ತೀರ್ಮಾನ ಕೊಡಬೇಕು ಎಂದು ಅವರು ಹೇಳಿದರು. ಇದು ಕುಡಿಯುವ ನೀರಿನ ಯೋಜನೆ, ತಮಿಳುನಾಡು, ಪುದುಚೇರಿ, ಕೇರಳ ಮತ್ತು ಬೆಂಗಳೂರಿಗೆ ಲಾಭ ಎಂದೂ ಅವರು ವಾದಿಸಿದರು.
ಇದು ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರ ವಾದ. ತಮಿಳುನಾಡಿನ ನಾಯಕರ ಮಾತು ಬೇರೆಯೇ ಇದೆ. ಸುಪ್ರೀಂ ಕೋರ್ಟ್ ಇಂಥ ಆದೇಶ ಕೊಟ್ಟೇ ಇಲ್ಲ ಎಂದು ಅವರು ಹೇಳುತ್ತಿದ್ದಾರೆ. ಕೇಂದ್ರ ಜಲ ಆಯೋಗ 2019ರ ಯೋಜನಾ ವರದಿಯನ್ನು ಪರಿಷ್ಕರಣೆಗೆ ವಾಪಸ್ ಕಳಿಸಿರುವುದು ಕೂಡ ಸತ್ಯ!
ಎರಡನೆಯದು ಕಸ್ತೂರಿರಂಗನ್ ವರದಿ. ಪಶ್ಚಿಮ ಘಟ್ಟಗಳ ಕುರಿತ ಈ ವರದಿಯನ್ನು ರಾಜ್ಯ ವಿರೋಧಿಸುತ್ತದೆ. ಸಮಾಲೋಚನೆ ನಡೆಸಿ ಸರ್ವಾನುಮತದ ನಿರ್ಣಯ ಅಂಗೀಕರಿಸಿರುವುದಾಗಿ ಹೇಳಿದ ಮುಖ್ಯಮಂತ್ರಿಗಳು, ರಾಜ್ಯದ ಆತಂಕ ನಿವಾರಿಸಲು ಪ್ರಧಾನಿಗಳು ಮಧ್ಯಪ್ರವೇಶಿಸಬೇಕು ಎಂದು ಕೋರಿದರು. ಪಶ್ಚಿಮ ಘಟ್ಟದ ಮಡಿಲಲ್ಲಿರುವ ಕೊಡಗಿನಂಥ ಜಿಲ್ಲೆಗಳ ಜನರಿಗೆ ಈ ವರದಿಯ ಹೆಸರು ಹೊಸದಲ್ಲ.
ಮೂರನೆಯದು ಶಾಲೆ. ಸರ್ಕಾರಿ ಶಾಲೆಗಳ ಶಿಕ್ಷಣ ಸುಧಾರಣೆಗೆ ಕಂಪನಿಗಳ ಸಿಎಸ್‌ಆರ್ ಹಣ ಹರಿಯುವಂತೆ ಪ್ರತ್ಯೇಕ ನೀತಿ ಬೇಕು ಎಂದರು. ಇದನ್ನು ಈಗಾಗಲೇ ಕೇಂದ್ರ ಹಣಕಾಸು ಸಚಿವರ ಬಳಿ ಪ್ರಸ್ತಾಪಿಸಿರುವುದಾಗಿ ಅವರು ಹೇಳಿದರು. ಹಳ್ಳಿಯ ಮಕ್ಕಳಿಗೂ ನಗರದ ಮಕ್ಕಳಿಗೆ ಸಿಗುವಷ್ಟೇ ಗುಣಮಟ್ಟದ ಶಿಕ್ಷಣ ಸಿಗಬೇಕು ಎನ್ನುವುದು ಅವರ ಮಾತು.
ಒಂದೇ ದಿನ ಉಡುಗೊರೆ ತಂದವರೂ ಇದ್ದರು! ಬೇಡಿಕೆ ಇಟ್ಟವರೂ ಇದ್ದರು! ಈಗ ಚಂಡು ದೆಹಲಿಯ ಅಂಗಳದಲ್ಲಿದೆ! ಉಡುಗೊರೆಗಳು ಬೆಂಗಳೂರಿನಲ್ಲಿ ಹಳಿ ಹತ್ತಿವೆ.!ಮೇಕೆದಾಟು ಮಾತ್ರ ಇನ್ನೂ ಹಳಿಯ ಮೇಲೆ ನಿಂತಿಲ್ಲ!
ವರದಿ : ಓಯಾಸಿಸ್ ಸುದ್ದಿ ಮನೆ
ಓಯಾಸಿಸ್ ಸುದ್ದಿ ಮತ್ತು ಜಾಹೀರಾತುಗಳಿಗಾಗಿ ಸಂಪರ್ಕಿಸಿ: nammaoasis@gmail.com, +91 8147424128