ವರದಿ : ಕಂದಾ ದೇವಯ್ಯ, ಕೊಡಗು

ಗೋಣಿಕೊಪ್ಪ: ಗೋಣಿಕೊಪ್ಪ ಕಾವೇರಿ ದಸರಾ ಸಮಿತಿಯ ವತಿಯಿಂದ ನಡೆದ ದಶಮಂಟಪ ಶೋಭಾಯಾತ್ರೆ ಈ ಬಾರಿಯೂ ಸಾವಿರಾರು ಜನರ ಕಣ್ಣು ತುಂಬಿಸಿ ವಿಜೃಂಭಣೆಯಿಂದ ಯಶಸ್ವಿಯಾಗಿ ಜರುಗಿತು.
ದಸರಾ ಮಹೋತ್ಸವದ ಪ್ರಮುಖ ಆಕರ್ಷಣೆಯಾದ ಈ ಶೋಭಾಯಾತ್ರೆಯಲ್ಲಿ ವಿವಿಧ ದಶಮಂಟಪ ಸಮಿತಿಗಳು ತಮ್ಮ ಕಲಾ ವೈಭವವನ್ನು ಪ್ರದರ್ಶಿಸಿದವು. ಇಂತಹ ಒಂದೊಂದು ಮಂಟಪದ ಹಿಂದೆಯೂ ಸಮಿತಿಯ ಸದಸ್ಯರ ಶ್ರಮ, ಕಲಾವಿದರ ಕನಸು ಇರುತ್ತದೆ. ಅದೆಲ್ಲವೂ ಶೋಭಾಯಾತ್ರೆಯಲ್ಲಿ ಜನರ ಮುಂದೆ ತೆರೆದುಕೊಂಡಿತು. ಸಾವಿರಾರು ಜನ ರಸ್ತೆಯ ಇಕ್ಕೆಲಗಳಲ್ಲಿ ನೆರೆದು ಶೋಭಾಯಾತ್ರೆಯನ್ನು ಕಣ್ತುಂಬಿಕೊಂಡರು.
ಸ್ಪರ್ಧೆಯಲ್ಲಿ ಸ್ನೇಹಿತರ ಬಳಗ, ಕೊಪ್ಪ ಪ್ರಥಮ ಸ್ಥಾನ ಗಳಿಸಿ ಐವತ್ತು ಸಾವಿರ ರೂಪಾಯಿ ನಗದು ಮತ್ತು ಟ್ರೋಫಿಯನ್ನು ತನ್ನದಾಗಿಸಿಕೊಂಡಿತು. ದ್ವಿತೀಯ ಸ್ಥಾನ ಶ್ರೀ ಶಾರದಾಂಬ ದಸರಾ ಸಮಿತಿಗೆ ಒಲಿಯಿತು. ಮೂವತ್ತು ಸಾವಿರ ರೂಪಾಯಿ ನಗದು ಹಾಗೂ ಟ್ರೋಫಿ ಅವರದಾಯಿತು. ತೃತೀಯ ಸ್ಥಾನ ಪಡೆದ ಯುವ ದಸರಾ ಸಮಿತಿಗೆ ಇಪ್ಪತ್ತು ಸಾವಿರ ರೂಪಾಯಿ ನಗದು ಹಾಗೂ ಪಾರಿತೋಷಕ ನೀಡಲಾಯಿತು.
ಗೆದ್ದವರಿಗೆ ಬಹುಮಾನ, ಉಳಿದವರಿಗೆ ಅನುಭವ. ಆದರೆ ಈ ಹಬ್ಬದ ನಿಜವಾದ ಗೆಲುವು ಯಾವುದೆಂದರೆ, ಇಷ್ಟು ದೊಡ್ಡ ಜನಸಾಗರದ ನಡುವೆಯೂ ಕಾರ್ಯಕ್ರಮ ಅಚ್ಚುಕಟ್ಟಾಗಿ ನಡೆದದ್ದು. ಪೊಲೀಸ್ ಇಲಾಖೆಯ ಅಚ್ಚುಕಟ್ಟಾದ ಬಂದೋಬಸ್ತ್, ದಸರಾ ಸಮಿತಿಯ ಉತ್ತಮ ನಿರ್ವಹಣೆ ಮತ್ತು ಎಲ್ಲ ದಶಮಂಟಪ ಸಮಿತಿಗಳ ಸಹಕಾರ ಇದಕ್ಕೆ ಕಾರಣ ಎಂದು ವರದಿಯಾಗಿದೆ.
ಈ ಹಿಂದೆ ಮಹಿಳೆಯರಿಗಾಗಿ ಮಹಿಳಾ ದಸರಾ ನಡೆಸಿದ ಇದೇ ಕಾವೇರಿ ದಸರಾ ಸಮಿತಿ, ಈಗ ಊರಿನ ಕಲಾವಿದರಿಗೂ ಯುವಕರಿಗೂ ತಮ್ಮ ಪ್ರತಿಭೆ ತೋರಿಸುವ ವೇದಿಕೆ ನೀಡಿದೆ. ಹಬ್ಬ ಹೀಗೆಯೇ ಇರಬೇಕು. ಒಂದು ಊರನ್ನು ಒಂದೆಡೆ ಸೇರಿಸಬೇಕು, ಎಲ್ಲರನ್ನೂ ಒಂದೇ ಸಂಭ್ರಮದಲ್ಲಿ ನಿಲ್ಲಿಸಬೇಕು.
ಗೆದ್ದ ಸ್ನೇಹಿತರ ಬಳಗ, ಶಾರದಾಂಬ ದಸರಾ ಸಮಿತಿ ಮತ್ತು ಯುವ ದಸರಾ ಸಮಿತಿಗೆ, ಹಾಗೂ ಭಾಗವಹಿಸಿದ ಎಲ್ಲ ದಶಮಂಟಪ ಸಮಿತಿಗಳಿಗೆ ಓಯಾಸಿಸ್ ಪತ್ರಿಕೆಯ ಅಭಿನಂದನೆಗಳು.
ವರದಿ : ಕಂದಾ ದೇವಯ್ಯ, ಕೊಡಗು
