ಸಾವಿರ ಹೃದಯಗಳು, ಒಂದೇ ಭಕ್ತಿ
ಗೋಣಿಕೊಪ್ಪಲು: ಕೊಡಗಿನ ಈ ಪುಟ್ಟ ಪಟ್ಟಣಕ್ಕೆ ‘ಮಿನಿ ದಸರಾ’ ಎಂಬ ಬಿರುದು ಸುಮ್ಮನೆ ಬಂದಿಲ್ಲ, ಬಂಧುಗಳೇ. ಆ ಬಿರುದನ್ನು ಪ್ರತಿವರ್ಷ ಇಲ್ಲಿನ ಜನ ತಮ್ಮ ಬೆವರಿನಿಂದ, ಭಕ್ತಿಯಿಂದ, ಸಂಭ್ರಮದಿಂದ ಗಳಿಸಿಕೊಳ್ಳುತ್ತಾರೆ. ಈ ಬಾರಿಯೂ ಗೋಣಿಕೊಪ್ಪಲು ಆ ಬಿರುದನ್ನು ಹೆಮ್ಮೆಯಿಂದ ಎತ್ತಿಹಿಡಿಯಿತು.
ಗೌರಿ-ಗಣೇಶ ವಿಸರ್ಜನೋತ್ಸವ ಇಲ್ಲಿ ಬರೀ ಒಂದು ಹಬ್ಬವಲ್ಲ. ಅದೊಂದು ಜನಸಾಗರದ ಒಗ್ಗಟ್ಟಿನ ಪ್ರತೀಕ. ಶ್ರದ್ಧೆಯ ಪ್ರತಿಬಿಂಬ. ಸಂಸ್ಕೃತಿಯ ಬೀಜ ಪ್ರತಿಯೊಂದು ಹೃದಯದಲ್ಲಿ ಇನ್ನೂ ಜೀವಂತವಾಗಿದೆ ಎಂಬುದರ ಸಾಕ್ಷಿ.
ಹಲವು ಮಂಟಪಗಳಿಂದ ಹೊರಟ ಭವ್ಯ ಶೋಭಾಯಾತ್ರೆ ಗೋಣಿಕೊಪ್ಪಲುವಿನ ಪ್ರಮುಖ ರಾಜಬೀದಿಗಳಲ್ಲಿ ಸಾಗಿಬಂತು. ಪ್ರತಿಯೊಂದು ಮಂಟಪವೂ ಒಂದೊಂದು ಕಥೆ ಹೇಳುತ್ತಿತ್ತು. ಒಂದೊಂದು ಬಣ್ಣದಲ್ಲಿ, ಒಂದೊಂದು ವಿನ್ಯಾಸದಲ್ಲಿ, ಗಣಪತಿ ಅಲ್ಲಿ ಕಳಸದಂತೆ ಕಳಕಳಿಸುತ್ತಿದ್ದ!
ಡಿ.ಜೆ.ಯ ಝೇಂಕಾರ ಒಂದೆಡೆ. ಭಕ್ತಿಗೀತೆಗಳ ಮಧುರ ನಾದ ಇನ್ನೊಂದೆಡೆ. ಈ ಎರಡರ ಸಂಗಮದಲ್ಲಿ ಸಾವಿರಾರು ಭಕ್ತರು ತಲೆದೂಗಿದರು. ಯುವಜನತೆ ಕುಣಿದು ಕುಪ್ಪಳಿಸಿ ಬೀದಿಯನ್ನೇ ರಂಗಮಂಚವಾಗಿಸಿದರು. ಮಕ್ಕಳ ಕಣ್ಣುಗಳಲ್ಲಿ ಆಶ್ಚರ್ಯ. ಹಿರಿಯರ ಬಾಯಿಯಲ್ಲಿ ಜೈಕಾರ. ಎಲ್ಲರ ಮನಸಿನಲ್ಲೂ ಒಂದೇ ಭಾವ “ಗಣಪ ಬಪ್ಪಾ ಮೋರಯಾ!”
ಈ ಎಲ್ಲಾ ಸಂಭ್ರಮದ ನಡುವೆಯೂ ಪಟ್ಟಣದ ಶಿಸ್ತು ಒಂದು ಕ್ಷಣವೂ ಕೆಡಲಿಲ್ಲ ಎಂಬುದೇ ಈ ವರ್ಷದ ಉತ್ಸವದ ವಿಶೇಷ. ಯಾವುದೇ ಅಹಿತಕರ ಘಟನೆ ನಡೆಯದೆ, ಸಾರ್ವಜನಿಕರ ಸಹಕಾರ ಮತ್ತು ಆಯೋಜಕರ ಸೂಕ್ಷ್ಮ ಯೋಜನೆಯಿಂದ ಇಡೀ ವಿಸರ್ಜನೋತ್ಸವ ಶಾಂತಿಯಿಂದ, ಶಿಸ್ತಿನಿಂದ, ಯಶಸ್ವಿಯಾಗಿ ಸಂಪನ್ನಗೊಂಡಿತು.
ಗಣಪತಿ ವರ್ಷಂಪ್ರತಿ ಬರುತ್ತಾನೆ. ಪ್ರತಿ ಬಾರಿಯೂ ಜನ ಕಣ್ಣೀರಿನಿಂದ ಬೀಳ್ಕೊಡುತ್ತಾರೆ. ಆದರೆ ಆ ಕಣ್ಣೀರಿನ ಹಿಂದೆ ಒಂದು ವಾಗ್ದಾನ ಇರುತ್ತದೆ “ಮುಂದಿನ ವರ್ಷ ಬೇಗ ಬಾ, ಗಣಪ.” ಆ ವಾಗ್ದಾನವನ್ನೇ ಹಿಡಿದು ಗೋಣಿಕೊಪ್ಪಲುವಿನ ಜನ ಈ ಬಾರಿಯೂ ಗಣಪತಿಗೆ ಬೀಳ್ಕೊಟ್ಟರು.
ವರದಿ: ಓಯಸಿಸ್ ಬಳಗ